*** శ్రీరామ ***
జూలై 10, ఈరోజు ప్రత్యేకత పెద్దగా ఎక్కువమందికి తెలిసుండకపోవచ్చు. మన టివి మీడియాకి కూడా సినిమారంగానికి చెందిన ఏ వ్యక్తి పుట్టినరోజు కాదు కాబట్టి ఈరోజు అంత ముఖ్యమయిన రోజు అనిపించదు. మన పేపర్ మీడియా అంతర్జాతీయ వార్తలు ఎంత వీలయితే అంత తక్కువ ప్రచురిస్తాయి. కాబట్టి మీకు తెలిసే అవకాశం లేదు .
సరే ... కరెంట్ లేని ప్రపంచాన్ని ఒక్కసారి ఊహించుకోండి. లైట్ బల్బులు , ఫ్యాక్టరీలు, లిఫ్ట్లు, క్రేన్లు, సినిమాలు, గృహవిద్యుత్ ఉపకరణాలయిన ఫ్రిజ్, టివి, మిక్సి, కంప్యూటర్లు, సెల్ ఫోన్లు వగైరాలు ఏవీ లేని ప్రపంచం అన్నమాట. అసలు ఆ ఊహే భయంకరంగా వుంది కదా. ఈరోజు మనకి ఆ సౌకర్యాలన్నీ అందుతున్నాయంటే దానికి కారణం కొంతమంది శాస్త్రజ్ఞుల మేధస్సు, వారి కష్టం. అందులో కొంతమంది వాళ్ళ జీవితం మొత్తం శాస్త్రపరిశోధనకే వెచ్చించారు. అందులో ఒక మహానుబావుడి పుట్టినరోజు ఈరోజు.
అతనే నికోలా టెస్లా (Nikola Tesla)
అతని మీద నాకున్న ప్రత్యేక అభిమానానికి కారణం అతను ఒక గొప్ప సైంటిస్ట్ అని మాత్రమే కాదు ...అతను అత్యంత ప్రతిభావంతుడు, అపర మేధావి ... Extraordinarily genius అని చెప్పగలిగే అతికొద్దిమంది వ్యక్తుల్లో ఒకడు. అతని ఊహశక్తి (imagination), జ్ఞాపకశక్తి (memory power) ఎంత గొప్పవంటే ... ఎన్నో పేటెంట్లను పెన్ను పేపర్ లేకుండా, అన్ని గణిత సమీకరణాలను తన ఊహలలోనే సాధించి, దానికి సంబంధించిన సాంకేతిక రేఖా చిత్రాలను తన ఊహలలోనే రూపొందించి, సరాసరి ఫైనల్ డిజైన్ ను రూపకల్పన చెయ్యగలిగిన అపర మేధావి. వ్యక్తిగత విషయాలకొస్తే అతని వయస్సు 30 సంవత్సరాలు నుండి 60 సంవత్సరాలు వచ్చేవరకూ అతని బరువు ఒక్క పౌండ్ కూడా పెరగకుండా తగ్గకుండా ఖచ్చితంగా మైంటైన్ చెయ్యగలిగిన పట్టుదల గల వ్యక్తి. అయితే కొన్ని కారణాల వల్ల
అతని మేధస్సుకి రావాల్సిన గుర్తింపు అంత త్వరగా రాలేదు.
అలాగే అతని గురించి చెప్పుకునేటప్పుడు ఇంకో గొప్ప శాస్త్రజ్ఞుడి ప్రస్తావన తప్పనిసరిగా వచ్చి తీరుతుంది.
అతనే థామస్ ఆల్వా ఎడిసన్ ( Thomas Alva Edison )
లైట్ బల్బు కనిపెట్టిన సైంటిస్ట్గా మనందరికీ సుపరిచితుడయిన ఇతని గురించి తెలుస్కోవాల్సింది చాలానే వుంది. తన జీవితంలో 1093 పేటెంట్లను పొందిన ఈ మహాశాస్త్రజ్ఞుడు కేవలం 3 నెలలు మాత్రమే బడికి వెళ్ళగలిగాడు. జీవితంలో ఎదురయిన ఎన్నో ఆటుపోట్లుని తట్టుకొని నిలబడి తను అనుకున్నది సాధించే వరకూ శ్రమించి ఎంతో మందికి ఆదర్శప్రాయమయినాడు. మధ్యతరగతి నుండి వచ్చి, చిన్నతనంలో కుటుంబాన్ని పోషించడానికి ట్రైన్ లో పేపర్లు అమ్మిన ఈ వ్యక్తి స్తాపించిన కంపెనీ "జనరల్ ఎలెక్ట్రిక్ (GE)" ఈ రోజు ప్రపంచంలోని అత్యంత పెద్ద MNC లలో ఒకటి. (రోజు అతను పనిచేసిన టేబుల్, కుర్చీ, ఇతర పరికరాలు చూస్తూ కొన్నాళ్ళు ఆ కంపెనీ గ్లోబల్ రీసెర్చ్ సెంటర్ లో పనిచేసే అవకాశం రావడం నా అదృష్టం) ..
వీరిద్దరిలో ఎవరూ గొప్ప ఆంటే చెప్పలేం. ఇద్దరులో ఎవరూ విద్యుత్ కనిపెట్టలేదు కానీ ఆ విద్యుత్ ని మానవాళికి ఉపయోగపడేలా చెయ్యాలని తపించారు. విద్యుత్ ని సామాన్య మానవుడి దగ్గరకు చేర్చారు. వీళ్ళిద్దరి జీవితాలగురించి, వాళ్ళ మద్య జరిగిన సైద్ధాంతిక వైరం (దీన్నే "war of currents" అంటారు) గురించి చదువుతుంటే చాలా ఆసక్తికరంగా వుంటుంది. (ఒక సినిమా స్టొరీ రాసేయోచ్చు). వీటన్నిటి గురించి తరువాతి టపాల్లో వివరంగా చెప్తాను..... అప్పటివరకూ
Happy Birthday, Nikola Tesla!
ఇంతకీ పైన వున్న వాళ్ళలో ఎడిసన్ ఎవరో , టెస్లా ఎవరో గూగుల్ సెర్చ్ చెయ్యకుండా ఊహించండి ....
(సశేషం)
-మంచు